Deputeti i Kuvendit të Kosovës nga radhët e Lëvizjes Vetëvendosje, Rexhep Selimi, ka komentuar përplasjet mes ish-bashkëluftëtarëve të tij, Anton Qunit dhe Xhavit Halitit, për miliona markat që janë ndarë për ndihmë Ushtrisë Çlirimtare të Kosovës.

Selimi ka thënë në emisionin “DPT Te Fidani”, në televizionin T7, se dy deputetët, njëri nga Lidhja Demokratike e Kosovës, e tjetri nga Partia Demokratike e Kosovës, po bëjnë një “debat të pakuptimtë”.

Debati, sipas tij, nuk po bëhet në formën, në mënyrën dhe në vendin e duhur.

Megjithatë, Selimi ka thënë se “do të ishte shumë e rëndësishme për qytetarin të dinte se ku është shpenzuar çdo markë e asaj kohe, çdo cent i asaj kohe”.

“Ky debat, a po i shërben kthjellimit apo të kundërtës?”, ka pyetur Selimi.

“Nuk po e kuptoj qëllimin e këtij debati”, ka theksuar ai.

Ai ka thënë se më së miri do të ishte që të bëhet një komision hetimor për fondet e luftës.